НИКОЛОСКИ: EУ има многу механизми со кои може да ја натера Бугарија да го повлече ветото
Објавено во: Македонија 20 Јуни, 2024
Од ВМРО-ДПМНЕ велат дека најдобра гаранција да нема вета и во иднина е дека доколку се направи било каков чекор кон Бугарија истиот да важи со завршување на преговорите, а не да е врзан со почеток на преговорите.
„Ние јасно во нашата програма ставивме кои се нашите позиции. Нашите позиции се Бугарија да ги исполни своите обврски кон Европскиот суд за човекови права и да ги примени пресудите и нашите позиции се дека мора да имаме гаранција дека нема да има следни вета“, изјави Aлександар Николоски, потпретседател на ВМРО-ДПМНЕ во гостување во дневникот на телевизија Канал 5.
Николоски додаде дека доколку ЕУ сака Македонија да почне преговори, истото може и да се реализира.
„Ако ЕУ смета дека Македонија треба да преговара и да стане членка има многу механизми со кои може да ја натера Бугарија да го повлече ветото, ако смета дека не треба да преговараме тогаш нема да преговараме и ќе ја развиваме државата самостојно“, изјави Николоски.
Македонија треба да ги внесе Бугарите во Уставот за да преговара за членство во ЕУ. Украина и Молдавија веќе почнаа преговори со ЕУ.