Нимиц чека политичка стабилизација на Македонија и Грција да продолжи со преговорите

Добивај вести на Viber

Метју Нимиц, назначениот олеснувач во преговорите за името од Обединетите нации, чека да се подобри политичката клима во Македонија и Грција за да продолжи со неговата медијација. Ова особено важи за Република Македонија која има неизвесна политичка состојба каде е прашање кој и дали воопшто ќе се формира нова влада. 

„Нимиц сака да што побрзо одново да ја реактивира медијацијата за преговорите. Изгледа подготвен да ги посети двата главни града на почетокот на годината, откако во Скопје ќе се формира влада, со цел да ги испита намерите на новата влада, но и на Атина и откако ќе добие целосна слика да се врати малку подоцна со конкретни идеи и предлози“ пишува грчкиот весник „Катимерини“.

Иако преговарачкиот процес е на стенд бај веќе две години поради македонската политичка криза и политичките проблеми во Грција, „Катимерини“ коментира дека странските дипломати оценуваат дека е создаден позитивен моментум преку зачестените средби меѓу двете страни и иницијативите за мерките за градење доверба, за кои се смета дека долгорочно може да се покажат конструктивни и корисни за двете страни. 

Оценките генерално се позитивни за односот на министерот за надворешни работи Никос Коѕиас кон македонската страна, додека пак странските дипломати се критични и незадоволни од односот на претседателот Прокопис Павлопулос поради неговите чести радикални изјави за Македонија.