НИНА НЕДАНОСКА Е НОВА В.Д. ЧЛЕНКА НА ОДБОРОТ НА ДИРЕКТОРИ НА БЕРЗАТА - пополнето испразнетото место од Шпаркасе банка
Објавено во: Финансии 10 Ноември, 2023
Нина Неданоска, заменик-претседател на Управниот одбор на Шпаркасе Банка АД Скопје, ќе биде вршител на должноста неизвршен член на Одборот на директори на Македонската берза за харии од вредност.
На оваа позиција до неодамна беше Петар Трпески, но тој мораше да ја напушти функцијата поради фактот што замина да работи во НЛБ Банка.
Инаку, Шпаркасе банката е еден од акционерите на Македонската берза, и по таа основа номинира свој член во Одборот на директори на таа институција.
За именувањето на Нина Неданоска извести и самата Берза преку објава на својата веб страница.
„Во согласност со член 166-б од Законот за хартии од вредност известуваме дека со цел усогласување на составот на органот на управување со Статутот на друштвото и законските прописи, на ден 03.11.2023 година, Одборот на директори на Македонска берза АД Скопје донесе Одлука за избор на вршител на должност неизвршен член на Одборот на директори на Берзата, согласно која за вршител на должност неизвршен член на Одборот е избрана г-ѓа Нина Неданоска“, се вели во објавата од самата Берза.
Инаку, Нина Неданоска која сега е втор човек во Шпаркасе банката, јавноста ја памети и како поранешна директорка на Охридска банка, која по спојувањето на банката кон Шпаркасе, премина на висока раководна позиција во Шпаркасе, односно стана заменик претседател на Управниот одбор.Н.Н.Ф.