НОЌНА АКЦИЈА НА МВР: Приведени 13 лица, од кои шестмина малолетници

Добивај вести на Viber

Министерството за внатрешни работи информира дека полициски службеници од СВР Скопје синоќа и денеска во периодот од 19.00 до 02.30 часот на подрачје на Центар извршија акциска контрола во угостителски објекти во координација и соработка со Државниот пазарен инспекторат.

Акцијата опфатила проверки во 12 локали. Во неа, полицијата привела вкупно 13 лица: четворица поради кривични дела и деветмина поради други основи, од кои шестмина биле малолетни.

Против четирите лица кои биле лишени од слобода, ќе бидат поднесени кривични пријави за дела предвидени во член 215 став 3 и член 236 став 1 од Кривичниот законик – Неовластено производство и пуштање во промет наркотични дроги, како и овозможување употреба на наркотични средства.

Биле регистрирани и прекршувања на неколку закони, меѓу кои Законот за лична карта, Законот за безбедност на сообраќајот на патиштата, Законот за возила и Законот за оружје.

Во текот на контролата биле извршени 26 проверки на идентитети, 23 прегледи на лица и 11 прегледи на возила. Седум возила биле отстранети од сообраќај со помош на специјално возило „Пајак“.

Паралелно со ова, припадниците на Единицата за недозволена трговија презеле оперативни активности при што 2 лица биле приведени заради утврдување на идентитет, а дополнително биле легитимирани уште 22 лица. Извршени се прегледи кај 19 лица и 8 возила.

МВР најави дека ваквите контроли ќе продолжат и во наредниот период со цел зголемување на безбедноста и спречување на криминалните активности.