Нов момент во партиското помирување: Ќе се скенираат навивачки групи, ЛГБТ, говор на омраза....

Добивај вести на Viber

Има нов момент во политичко-партиското помирување, откако Работната група во Собранието составена од владини и независни пратеници утврди дека тоа ќе се проширува и на општествени пори кои не се директно под влијание на високата политика, однсоно нема да се однесува само за настаните од „27 април“.

Групата постојано ќе заседава и ќе идентификува други извори на конфликти кои произведуваат политички кризи, поделби, недоверба, конфликти...

Ќе бидат опфатени навивачките групи, подобрување на консензуалноста, третманот на ЛГБТ групата, монтирани политички процеси, говорот на омраза, скандалот со прислушкуваните материјали, соработка меѓу локалната и централната власт, колку е добар кривичниот законик итн.

„Произлегоа многу добри предлози кои сите во пратеничките групи ќе ги продискутираат. Она што е важно ги прецизиравме насоките кон кои ќе се движиме бидејќи е важна оваа политичка одлука. Сите сме за донесување на законско решение со кое ќе започне релаксација на односите во општеството без да се нарушат принципите на владеење на правото. Сметаме дека е потребно сите институции да го стават државниот интерес во дадениот момент, а ги повикуваме и медиумите позитивно да се вклучат во овој процес“, нагласи Зекир Рамчиловиќ, претседателот на Работната група за помирување.

Учествувале сите членови и утврдиле дека до 5 декември треба да излезат со предлог до Интерпарламентарното тело за реформи, интеграција и помирување.