Нов претседател на КСС, стари проблеми на македонските синдикати!

Добивај вести на Viber

Закониите се добри но стојат само на хартија, минималната плата не соодветствува на стандардот на граѓаните, а синдикалните права се уште се на ниско ниво, остро критикува Питер Зајденек од Европската конфедерација на Синдикати. Тој посочи и дека невработеноста и сиромаштијата се главни проблеми во земјава, а синдикалните лидери лесно дозволуваат кратење на на работничките права. „Секако потребни се странски инвестиции, но оние што ќе инвестираат не смее да побараат работникот да потпише дека се откажува од членство или од иницијатива за формирање на синдикат“ изјави денеска  Питер Зајденек кој беше поканет како гостин на изборот за претседател на Конфедерацијата на слободни синдикати (КСС) на Македонија. За нов претседател, со мнозинство гласови беше избрана Мирјана Андреска од Самостојниот синдикат за образование, наука и култура (СОНК). „Ќе се обидеме преку социјалниот дијалог да се погрижиме за зачувување на работните места, за одржување или пораст на веќе утврдената минимална плата, како и задруги прашања во интерес на работниците“, посочи Андреска. Предизвик за неа исто така е и потпишувањето на новиот општ колективен договор за јавниот сектор кој е во завршна фаза. Министерот за труд и социјална политика Спиро Ристовски, кој присуствуваше на конгресот, им порача на синдикалните лидери дека Владата ќе работи и понатаму на развој и унапредување на дијалогот со цел приближување кон европскиот социјален модел. Според него биле создадени предусловите за воспоставување, функционирање и јакнење на синдикатите, па затоа вели Министерот треба да ги охрабриме работниците за синдикално организирање.