НОВ САЈТ-РЕВАКЦИНАЦИЈА. МК: Да се пријават граѓаните над 60 години за втората доза од АстраЗенека

Добивај вести на Viber

Министерот за здравство, Венко Филипче, на денешната прес-конференција, откако и официјално ги соопшти препораките на Комисијата за заразни болести за олабавување на мерките од 1.јуни, даде и детални појаснувања во однос на ревакцинацијата на граѓаните со вакцината на АстраЗенека, кои првата доза ја примија во сеседна Србија кон крајот на март.

-Иако со српскиот министер за здравство, Златибор Лончар разговаравме интензивно во однос на дел од вакцините кои се за ревакцина на нашите граѓани вакцинирани во Србија, за жал тие не може да ни ги извезе. Така што ние од денеска ќе активираме уште еден сајт кој ќе биде линк од сајтот vakcinacija.mk, ќе го носиме до revakcinacija.mk, кaj што ќе се пријават сите граѓани. Очекуваме околу 20 јуни да има најголема бројка за ревакцина со АстраЗенека, и согласно нашите критериуми може да обезбедиме една количина и согласно тоа да го направиме планот, истакна министерот Филипче.

Министерот посебно нагласи дека за ревакцина со АстѕраЗенека ќе може да се пријават само граѓаните над 60 години, помладите нема да бидат ревакцинирани со оваа вакцина тука. Прашан дали Македонија ги доби списоците од соседна Србија на вакцинирани граѓани, Филипче одговори дека тие се уште не се доставени, но за да едно лице биде евидентирано дека ја завршило вакцинацијата против Ковид-19, треба да се пријави кај матичниот лекар

-Списоците не ги добивме, иако неколкупати разговаравме со министерот Лончар. Може кој било граѓанин ревакциниран на кое било место да се пријави кај матичниот лекар и тој во податокот ќе стави дека граѓанинот е ревакциниран, изјави Филипче.

Истовремено потенцираше дека сертификатите за вакцинација што ги добиваат нашите граѓани во Србија се сосема валидни и QR-кодот ќе може да се скенира во македонскиот дигитален пасош. Апликацијата треба да биде во употреба овие денови.