Нова фабрика предводена од поранешен градоначалник на Неготино ќе добива државна помош

Добивај вести на Viber

ТТ Кабели, компанијата за производство на нисконапонски кабли, управувана од поранешниот градоначалник на Неготино, Тони Делков, доби државна помош за изградбата на новата фабрика „Кабекс Каблес“, инвестиција што доаѓа од БИХ.

За изградбата на новата фабрика во Неготино овој инвеститор за прв пат од државата во текот на крајот на септември добил првична помош од околу 185.000 евра. Интересно е тоа што оваа фабрика ќе биде управувана од претходниот градоначалник на Неготино, Тони Делков.

- Јас во оваа компанија сум директор од 2015. Значи пред да го добијам мандатот за градоначалник и се вратив во меѓувреме на старата позиција. За ова што прашувате е државна помош, но е добиена на основа на најавена инвестиција. Фабриката е во индустрискиот комплекс на ИГМ и инсталациите се довршуваат. Покрај тоа, за да ја добиеме таа помош треба да се исполнуваат и други услови - да се зголемува бројот на вработени и да не се намалуваат остварените приходи, ни изјави Делков.

Инвестицијата што годинава ја најави босанската групација ТТ Кабели, која ќе биде лоцирана во новата индустриска зона, во индустрискиот парк на компанијата ИГМ, во близина на стариот автопат Неготино – Скопје, треба да изнесува 20 милиони евра.

-Новата фабрика ќе се простира на 20.000 метри квадратни во Неготино, и ќе биде дел од ТТ Кабели групацијата, која има повеќе од 400 вработени, а производите ги продава во повеќе од 50 земји ширум светот. Фабриката во Неготино ќе се вика Кабекс Каблес – ТТ Кабели Македонија, објави тогаш инвеститорот, а меѓудругото наведе и дека се работело една година на проектот. Оваа инвестиција, според најавата треба да отвори 90 нови работни места, но и бизнис можности за стотици локални доставувачи.

Додаваат дека фабриката ќе биде опремена со најсовремени машини и линии за производство, и максимално ќе се почитуваат безбедносните и еколошките прописи.

„Инвестицијата во нова фабрика во Северна Македонија и обезбедува на нашата групација нов опсег на кабли за сигнал, контрола и инструменти, како и проширување на постоечките капацитети за нашата продажна мрежа. Новата фабрика има капацитет од приближно 30.000 тони кабли низ 30 производни линии. Оваа инвестиција ќе создаде 90 нови висококвалитетни работни места и деловни можности за приближно 100 локални добавувачи, поттикнувајќи го економскиот развој не само во Северна Македонија, туку и во целиот регион“,гласи најавата на инвеститорот.

Од Владата потврдија дека ТТ Кабели веќе добива државна помош, а дека договорот бил потпишан на почетокот на оваа година, а исплатата е за инвестиција реализирана во 2023.

„Ве информираме дека компанијата потпишала договор за државна помош со Влада во февруари 2024 година. Согласно тој договор, компанијата има право да поднесува годишни барања за исплата на инвестициите кои ги реализирала во претходната година. Првото такво барање за исплата било доставено до Владата некаде во месец јуни годинава, за инвестициите направени во 2023 година.

Владата по прегледување на тоа барање, заедно со целата придружна документација во која ТТ Кабели ја докажува реализираната инвестиција е побарана исплата за направената инвестиција“, објаснуваат од Владата.

Кабекс Каблес е во сопственост на Дарко Томиќ од Широки Бријег, а Делков е управител на македонската компанија, која официјално е основана во 2016. Приходот во 2023 бил 8 милиони евра, а добивката изнесувала околу 675.000 евра.

Тони Делков во 2017 победи на локалните избори во Неготино. Поранешниот долгогодишен секретар на СДСМ Неготино по еден мандат загуби од Горан Стојанов.

А.К.