Нова надеж со новиот Совет за реформи во правосудството
Објавено во: Македонија 29 Март, 2018
Владата го комплетираше и екипираше новиот Совет за спроведување на реформи во правосудството кој ќе го води лично премиерот Зоран Заев и во него за среќа нема место за досегашните кадри од судовите, обвинителствата и советите за кои јавноста имаше негативна перцепција и за кои се сомневаше дека се едни од главните виновници за актуелните состојби во правосудството кое се карактеризира со делумно селективна правда, бавни процеси, несоодветни казни и несоодветно водени постапки и обвиненија.
Во новиот совет има доста звучни имиња како на пример специјалната јавна обвинителка Катица Јанева, државниот јавен обвинител Љубомир Јовески, а ги нема Јово Вангеловски како претседател на Врховниот суд, Зоран Караџовски претседателот на Судскиот совет и претседателот на Советот на јавни обвнители Коле Штерјов.
Новото советодавно тело ќе има клучна улога во креирање на законската легислатива која го уредува правосудството, ќе треба да даде идеални решенија за надминување на зависноста на дел од судовите и судиите, на слабостите во јавните обвинителства кои не се занимаваат со предмети на корупција во високите редови на власта, како и за грешните политики кои создадоа бесправна држава.
Премиерот Заев ќе ги има на располагање и советите на правните експерти од најдобрите универзитети во државата како Гордана Лажетиќ, професорка на Правниот факултет во Скопје, Беса Арифи, вонреден професор на Универзитетот на Југоисточна Европа, потоа адвокатите Звонко Давидовиќ од Скопје и Ибраим Бајрами од Тетово и претседателот на Здружението на судии Џемаили Саити, Мирјана Радевска-Стефкова од Врховниот суд, Лидија Димчевска од Апелациониот суд во Скопје, Шефајет Хајдари од Апелациониот суд во Гостивар, Антонио Јолевски од Основното јавно обвинителство во Битола, Ристе Бојаџиски од ОЈО во Штип, Иван Џолев, претседател на Основниот суд Скопје 1 и Илир Сулејмани, претседател на Основниот суд Скопје 2.
Од судската фела се приклучија претседателот на Здружението на судии Џемаили Саити, Мирјана Радевска-Стефкова од Врховниот суд, Лидија Димчевска од Апелациониот суд во Скопје, Шефајет Хајдари од Апелациониот суд во Гостивар, Антонио Јолевски од Основното јавно обвинителство во Битола, Ристе Бојаџиски од ОЈО во Штип, Иван Џолев, претседател на Основниот суд Скопје 1 и Илир Сулејмани, претседател на Основниот суд Скопје 2.
Од владата место има за заменик министерот за правда Оливер Ристовски, како и за идниот министер за правда кој допрва ќе биде назначен.
Членови на ова владино тело се и Александар Тумановски, како претставник на Адвокатската комора, Магдалена Несторовска, како претставник на МВР, Марија Митевска од Министерството за финансии и Џелал Бајрами од Јавното обвинителство.
Заев, како што соопштија од Владата, рекол дека формирањето на Советот е со цел враќање на дигнитетот на правосудствто и обезбедување правда и право согласно очекувањата на граѓаните. На конститутивната седница, бил презентиран нацрт-деловникот за работа на Совето, а за следната недела е закажана нова средба на која ќе треба да се изгласа деловникот, а ќе се разгледуваат и закони кои се во владина или во собраниска процедура.
Х.С.