Нови 28 аптеки во руралните средини, 22 концесии останаа неискористени

Добивај вести на Viber

Ново 28 лиценци за отворање аптеки главно во руралните области додели министерството за здравство. Иако огласот дозволил 50 концесии за отворање аптеки што ќе склучат договор со ФЗОМ, за останатите 22 концесии немало доставено понуваи.

Според Министерот, Никола Тодоров, од новите аптеки бенефит ќе имаат околу 60 илјади граѓани.

„Станува збор за граѓани кои живеат во руралните средини и досега немале можност да имаат аптека во близина на местото на живеење или аптеките немале договор со Фондот, поради што граѓаните не можеле да ја земат терапијата со плави картони“,истакна Тодоров. Најголем број од новите аптеки се во Скопско Во Скопскиот регион доделени се девет концесии. Во општина Сарај лиценци за отворање аптеки има во селата Долно Свиларе, Глумово и Буковиќ, во селата Ракотинци (општина Сопиште), Кучевиште (општина Чучер Сандево), во општина Илинден, една аптека во село Петровец, како и две во Ѓорче Петров, една во општината и една во Ново Село.

Две лиценци се доделени во општина Неготино и една во Демир Капија, во Вардарскиот регион. Во Пелагониско-полошкиот регион доделени се осум лиценци за отворање аптеки од кои две се за општина Јегуновце и по една во општина Могила, во селата Новаци, Добри Дол (Врапчиште),  Форино (Гостивар), Теарце и Брвеница.

Во Северо-источниот регион аптеки ќе бидат отворени во Крива Паланка, Липково (село Матејче) и во општина Старо Нагоричане, додека во Југоисточниот регион се доделени лиценци за отворање нови аптеки во селата Иловица (општина Босилово) и Карбинци (општина Пехчево). Во Југозападниот регион доделена е една концесија за отворање по една аптека во општина Македонски Брод и во село Октиси/Подгорци во струшкиот регион.

Нема интерес во голем број села

Како што денеска информираше Тодоров, во дел од руралните подрачја немало доставено ниту една понуда. Станува збор за селата Долнени, Врапчиште, Желино, Маврово и Ростуше, Богомила, Ранковце, Сарај, Мирковци, Моноспитово, Дебарца и Конче. Во Лозово пак, идните концесионери го испуштиле рокот за пријавување.