Нови инвестиции за „Кумановско-липковско поле“

Добивај вести на Viber

Прво ја обиколија браната Липково, а потоа најавија инвестиции за водостопанство „Кумановско-липковско поле“. За време на денешната посета на овој реон,  заменик министерот за земјоделство, шумарство и водостопанство Зоран Коњановски презентираше кои се идните планови. „Триесетина години не се вложени средства во овој систем, кој е мошне значаен за водоснабдувањето. Инвестирани се 9,6 милиони денари во овој систем, возобновена е опремата на зафатните објекти и хидромеханичката опрема во затворачницата, возобновени се сите елементи на темелниот испуст, со што се добива сигурност на браната и можност за беспрекорно функционирање на хидромеханичката опрема на оваа брана“, рече Коњановски и најави дека годинава се планира да се вложат 6 милиони денари за водостопанство „Кумановско-липковско поле“, а набавена е опрема за геодетска оскултација на браната што, како што рече, значи дополнителна сигурност на објектот. Во Министерството е објавен тендер во висина од 23 милиони денари за изведување на  геодетски работи и основен проект за Слупчанска река, информираше Коњановскии кој рече дека предизвик сега е да се создадат дополнителни површини земјоделско земјиште кое се наводнува. Директорот на водостопанство „Кумановско-липковско поле“ Филип Филиповски пак посочи дека инвестициите се исклучително значајани за нормално водоснабдувањето. - Следуваат уште четири нови проекти што ќе се реализираат во делот на браните Липково и Глажња, обнова на каналската мрежа во долж од 165 километри квадратни, вели Филиповски и додава дека во овој период има 19 милиони кубни метри вода и оти оваа количина е доволна и за водоснабдувањето, индустријата и земјоделците.