Нови мерки на Тодоров, директорите нема да седат во кожни столици

Добивај вести на Viber

Прво да го известат Министерството, а потоа да отсуствуваат од работа. Ова во иднина ќе важи за сите директори на клиниките кога ќе треба да бидат отсутни од работа поради посета на конгреси, семинари, или пак користење одмор, побара денеска министерот за здравство Никола Тодоров. Тој најави дека парично ќе ги казни двајцата диретори од скопските клиники, кои при ненајавената петочна инспекција беа отсутни од на работа, ако немаат добро оправдување кое ќе мора и писмено и усно да му го достават на Тодоров. „Да се биде директор не значи да се седи во кожна столица, туку да се биде пример за вработените. Доброто однесување на директор е добар пример и за вработените, но негативниот исто така, е негативен пример за докторите“, рече Тодоров. Министерот најави дека директорите кои потфрлиле во работните обврски, ќе бидат повикани на разговор во Министерството за здравство. „Директорите на клиниките се должни да поведат дисциплинска постапка кон вработените кои не биле на работното место за време на инспекцискиот надзор, доколку, тоа, исто така, било од неоправдани причини“, појасни Тодоров. За време на ненајавената инспекциска контрола во петокот било проверувно колку го почитуваат работно време вработените во повеќе јавни здравствени установи во Скопје.Како што вчера информираше директорот на Државниот санитарен и здравствен инспекторат Џевџед Шаќири, биле забележани повеќе неправилности. Непочитување на работно време од страна на вработените имало на Клиниката за дерматологија, Клиниката за ревматологија и Клиника за гастроентерохепатологија. Во останатите Клиники (ОРЛ, Стоматологија, Неврологија, Очно, Ендокринологија и ГОБ „8-ми Септември“), посочи Шакири,  немало неправилности во однос на работно време и вработените.