Нови половина милион евра за владина кампања за здрав живот!

Добивај вести на Viber

Откако граѓаните ги научија лекциите да се хранат здраво со здрава храна, и рационално да ги користат лековите сега на ред е здравиот живот .

Телевизиски и радио спотови и  плакати секојдневно ќе ги потсетуваат граѓаните за користа од здравиот начин на живот.

Владата стартува со нова кампања за која од државната каса ќе издвои речиси половина милион евра и ќе  ги учи граѓаните дека вежбањето е здраво за животот.

За реализацијата на оваа кампања Владата склучила договори со три фирми,  кои ќе имаат за цел да ја имплементираат кампањата, а вкупната вредност на трите склучени договори е 33.504.238 денари, или околу 544.000 евра.

Њу моментс Њу идеас -доби најмногу пари од колачот и за 230.314 евра треба да подготви и реализира медиа план, да закупи медиумски простор за електронски и печатени медиуми и да направи внатрешно и надворешно рекламирање, Омега комуникејшн е задолжена за идејно решение и телевизиски и радио спотови за 211.810 евра додека  маркетинг агенцијата Маркет висион е задолжена за логото и идеите за плакати кои ќе се најдат на влезовите во зградите и лифтовите, веб банери и осмислување и реализација на пиар стратегија и за сето ова ќе добие 102.660 евра.

Склучениот договор кој е објавен на сајтот на Бирото за јавни набавки вели дека кампањата има за цел поттикнување на населението за водење севкупен здрав живот, како и подигање на свесноста за значењето и влијанието на редовната и зголемена физичка активност, врз примарната превенција од болестите и хроничните заболувања.

Да се потсетиме...

Минатата година со рекламна кампања вредна околу 500.000 евра Владата ги подучуваше граѓаните „за значењето и потребата за консумирање здрава храна и избегнување храна со несоодветен квалитет по нивното здравје“, додека пред еден месец беше објавено дека ќе се потрошат 468.000 евра за кампања, со која, има за цел да ја подигне свеста на граѓаните за рационална употреба на лекови.

Граѓаните околу ова прашање се поделени.

Според едни ваквите реклами се џабе фрлање на пари.

„Нека ни ги зголеми премиерот платите, ние знаеме како е добро да живееме здраво, секој сака да биде здрав, ама ако немаш пари немаш здравје“, вели еден граѓанин.

Други пак сметаат дека ваквите рекламни кампањи се корисни за сите а најмногу за младите.