Новите пратеници утре ќе добијат уверенија
Објавено во: Македонија 27 Декември, 2016
Државната изборна комисија (ДИК) утре свечено ќе им ги врачи уверенијата на претставниците на коалициите и на политичките партии кои освоија мандати на предвремените парламентарни избори, кои се одржаа на 11 декември.
„Ве известуваме дека уверенијата за пратениците избрани на предвремените избори за пратеници во Собранието на Република Македонија, ДИК ќе им ги врачи на овластените претставници на коалициите и на политичките партии кои освоија пратенички места, на свечен настан закажан за 28 декември 2016 година (среда) со почеток во 14 часот. Настанот ќе се одржи во седиштето на Државната изборна комисија (во зградата на поранешниот НИП „Нова Македонија)“- стои во соопштението на ДИК.
По прогласувањето на конечните резултати и врачувањето на уверенијата, според Уставот, крајниот рок за конституирање на новото Собрание е 31 декември, односно 20 дена од одржувањето на изборите, кои во овој случај беа на 11 декември.
Се очекува претседателот на претходниот собраниски состав, Трајко Вељаноски, следните денови да ја свика конститутивна седница, а ако тоа не го направи од некоја причина, честа да ја свика и да ја води првата седница, според Деловникот на Собранието, ќе ја има највозрасниот пратеник од новоизбраниот состав – Бранко Маноиловски од ДУИ.
На предвремените парламентарни избори Коалицијата предводена од ВМРО-ДПМНЕ освои 51 пратеничко место, Коалцијата предводена од СДСМ – 49, ДУИ – 10, Движење Беса – 5, Алијанса за Албанците – 3 и ДПА – 2 пратенички места.Читајте уште
ЗА ПРВ ПАТ ВО ИСТОРИЈАТА: Кој е првиот Албанец кој ќе биде на чело на МВР?До изборот на нова влада со МВР и со Собранието ќе раководат кадри на ДУИ