Од МОСТ дадоа оценка за прегласувањето во Теарце - што забележале?

Добивај вести на Viber

Од граѓанската асоцијација МОСТ оценуваат дека прегласувањето на избирачкото место 2011 во Теарце помина во мирна атмосфера, со различна динамика во одзивот на гласачите, кој опадна во последните часови пред завршувањето на гласањето. 

Од МОСТ ја следеле  ситуацијата во периодот од поништувањето на резултатите од гласањето на 11 декември до прегласувањето. Потврдуваат дека немало инциднети, но со регистриран обид за поткуп, односно поднесена е кривична пријава против две лица, кои на гласачите во Теарце им нуделе поткуп за да не излезат да гласаат.

„Во текот на денот (вчера, во текот на прегласувањето) беше забележано зголемено присуство на полицијата околу гласачкото место. Околу 9 часот беше забележано дека УВ-ламбите не работат, па гласањето беше прекинато во период од 15 минути за да се набават нови, по што истото продолжи. Во понатамошната постапка на гласање и сумирање на резултатите на самото избирачко место не беа забележани нерегуларности“- стои во прелиминарната изјава на МОСТ.

За прегласувањето беа распоредени два набљудувачи кои го следеа гласањето на самото гласачко место, како и два мобилни тимови кои ја набљудуваа ситуацијата околу гласачкото место.

Од МОСТ велат дека Општинската изборна комисија Теарце имала проблем при составувањето на записникот број 21 за сумирање и утврдување на резултатите од гласањето на лицата кои своето избирачко право го оствариле во казнено-поправните установи. Ист проблем имало и на 11 декември во повеќе општински комисии.