ОДЛУЧУВАЧКА НЕДЕЛА: Датумот за избори виси на стаклени нозе

Добивај вести на Viber

Неделава која е на самиот старт ќе биде клучна за најавените предвремени парламентарни избори закажани за 11 декември.

Неизвесно е распуштањето на Собранието а моменталната состојба укажува дека најверојатно пратениците нема да се распуштат на 12 октомври имајќи предвид дека Собранието и официјално закажа пленарна седница за четврток 13 октомври.

Најголема кочница сепак за распуштањето на Законодавниот дом е буџетот за 2017 година, кој сам по себе носи многу контроверзии и побуди низа препукувања меѓу власта и опозицијата.

Собраниската расправа за буџетот за 2017 година сè уште не е завршена. Документот сè уште се разгледува на собраниските комисии, а потоа треба уште еднаш да оди на седница на влада, па да се стави на дневен ред на пленарна седница, на која ќе треба да се разгледува најмалку пет дена, а време за тоа нема.

Распуштањето ќе го чека и еврокомесарот Јоханес Хан

Во петок на 14 октомври во Скопје треба да пристигне еврокомесарот за проширување и соседска политика Јоханес Хан кој би требало да го разјасни политичкиот процес а се најавени средби со потписниците на договорот.

Хан доаѓа по одлуката на владејачкото мнозинство во парламентот да не ги поддржи барањата на специјалната јавна обвинителка за измени на Законот за СЈО, односно продолжување на рокот за истраги, како и за измена на Законот за заштита на сведоци а овие отфрлања на барањата се дополнителен тест кој изборите ќе става да висат на конец.

Опозицијата за неизгласаните барања на СЈО вели дека владеачката гарнитура го минира датумот за избори додека од ВМРО-ДПМНЕ велат дека СДСМ се тие кои бегаат од избори.

Како и да е, колку и да се препукуваат партиите едни со други, де факто неделава ќе биде решавачка за предвремените парламентарни избори.