Одлуката на МНР за протерување на рускиот дипломат Иванов ја оцени како избрзана
Објавено во: Македонија 27 Март, 2018
Претседателот на Република Македонија,Ѓорге Иванов, смета дека одлуката на Министерството за надворешни работи за протерувањето на рускиот
дипломат е избрзана одлука.
„Република Македонија како земја кандидат за членство во Европската унија, ја
следи политиката на ЕУ и нивните одлуки донесени по пат на консензус и на ниво
на ЕУ. Со оглед на тоа дека одлуките за протерување на руски дипломати не
претставуваат израз на усогласени ставови на сите земји-членки на ЕУ, туку се
работи за индивидуални одлуки на поедини земји-членки.“ стои во соопштението од
Кабинетот на претседателот Ѓорге Иванов во однос на одлуката на МНР за
протерување руски дипломат.
„Претседателот на Република Македонија повикува на воздржаност од избрзани чекори во надворешната политика, за да се спречи можното нанесување на штета во остварување на стратешките цели на Република Македонија“, се наведува во ставот од претседателскиот Кабинет.
Од таму додаваат дека претседателот на РМ, согласно позитивната законска регулатива, очекува да биде официјално информиран за посочените факти во јавноста, поврзани со овој случај.