Рафинеријата Oкта наскоро ќе стартува со сопствено производство во земјва , дознава Фактор. Најавата за старт на производството следува по шест месеци пауза на производството на нафтени деривати во ОКТА. Инаку , според официјалните информации доставени од компанијата до Министерството за економија производството во ОКТА е запрено поради редовен годишен ремонт а за цело време додека производството беше запрено се вршеше увоз на нафтените деривати. Засега нема официјална информација колкав увоз е направен и колку пари се одлеани за таа намена.
Од министерството за економија информираат дека според Договорот за купопродажба на Рафинеријата ОКТА , од 1999 година помеѓу Владата на Република Македонија и стратешкиот инвеститор ЕЛ.П.ЕТ.Балканики, ОКТА во првите 5 години од потпишување на Договорот (период кој е изминат ), има право на увоз на нафтени деривати во сооднос од 1:5 на увезени наспроти произведени нафтени деривати, до максимално вкупно количество на нафтени деривати од 1.500.000 тони годишно.
Пазарот на нафта и нафтени деривати во Македонија е целосно либерализиран и трговците на големо можат да вршат увоз и извоз на нафтени деривати. Исто така и ОКТА може да увезува сурова нафта и нафтени деривати според своите потреби и можностите за преработка на суровата нафта согласно техничко технолошкиот процес кој го поседува, а врз основа на лиценците кои ги поседува. Според податоците од Енергетскиот биланс за 2012 година, проектираното производство и увоз на нафтени деривати изнесува: производство 692.200 тони и увоз 200.000 тони.