ОМД: Kрајно време e сите политички лидери во Македонија да се воздржат од говорот на омраза

Добивај вести на Viber

Обединетата македонска дијаспора (ОМД) смета дека е крајно време сите политички лидери во Македонија да ја стават државата и нејзините граѓани на прво место, а воедно да се воздржат од говорот на омраза. 

ОМД смета дека на Македонија ѝ е потребна одговорна влада во најбрзо време, како што ѝ е потребна конструктивна и ефективна опозиција, бидејќи само тоа ќе овозможи и ќе гарантира подобрување на демократските процеси во државата.

Лидерите мора да покажат одговорност ако сакаат народот да ги следи нивните позитивни примери и лидерство, реагира ОМД по последните случувања во Република Македонија.

„Лидерите треба да се фокусираaт на почитување и нагласување на Уставот кој што ги гарантира правата на сите државјани, вклучувајќи ги и правата на малцинствата, кои што веќе се и ги уживаат сите права на рамноправни граѓани загарантирани во самиот Устав. Само во тој случај, сите жители во државата ќе се чувствуваат рамноправни и рамногласни, а како резултат на тоа, повиците и идеите на некои политички лидери за двојазичност, кантонизација и федерализација на државата ќе згаснат и ќе бидат побиени од самите жители на државата. Во изминатиов период се појавија многу информации во медиумите за наводни интервенции во внатрешната политика на Македонија од страна на странски дипломати од земји со кој Македонија има добри билатерални и стратешки односи. ОМД ги повикува странските дипломати во државата да се воздржат од евентуални интервенции во внатрешната политика на државата, особено во каква било форма на притисок врз лидерите на политичките партии околу составот на следната Влада.  Секое мешање и притисок кон една или друга партија може да доведе до зголемување на конфронтацијата помеѓу преставниците на политичките партии во државата, со што воедно може да предизвика сериозни и долготрајни меѓупартиски и меѓуетнички проблеми во Република Македонија“-соопшти ОМД.

Велат дека откако ќе биде формирана новата влада, дијаспората ќе биде таа што најмногу ќе ѝ помогне на татковината. Додаваат дека дијаспората со сите свои напори и можности ќе биде на распологање да помогне за социо-економското унапредување на Македонија, како и нејзиното евентуално полноправно членство во НАТО и ЕУ.