Операторите подготвени, дигитализацијата стартува на полноќ

Добивај вести на Viber

Најавувана со години, од полноќ и официјално аналогниот телевизиски сигнал заминува во историјата, а македонските граѓани ќе гледаат телевизија само преку дигитален сигнал. Целта на дигитализацијата, појаснуваат од АЕК е на гледачите да им се овозможи кристално чиста слика, беспрекорен звук и нови интерактивни услуги. Оние кои имаат кабелски приклучок, Макс и Бум ТВ или нов телевизор со вграден дигитален примник, нема да имаат проблем. Но гледачите кои имаат постар модел на телевизор и собна антена од утре на овој начин нема да можат повеќе да гледаат телевизија. Тие ќе треба да издввојат од својот буџет дополнителни средства или за да купат нов телевизор со вграден уред за дигитален прием, или пак дигитален приемник (сет топ бокс) за да можат да следат телевизиска програма. Како главната разлика во однос на досегашното аналогно емитување, надлежните ја посочија употребата на еден фреквентен канал за пренос на повеќе телевизиски програми во исто време. Дополнително дигитализацијата  овозможува воведување и на 4G (четврта генерација на широкопојасни мобилни мрежи) со што се обезбедува голема брзина на интернет пристап.  Ќе се  добие и повеќеканален тон, односно дополнителни услуги како титлување на повеќе јазици и можност за избор на саканиот јазик, електронски телевизиски водич со термин на прикажување и опис на емисиите до седум дена однапред, прием на телевизиските сервиси и со други „паметни“ уреди и средства (персонален компјутер, телефон, лаптоп, таблети и друго). Ова сепак, коментираат експертите, оние кои сакаат да го користат ќе треба дополнително да го платат. Од вкупно 61 телевизија во целата држава  60 телевизии побараа промена на дозволата од Советот за радиодифузија (СРД) за премин од аналогно во дигитално емитување. Од нив 30 телевизии ќе емитуваат програма преку ОНЕ, а 30 преку кабелски оператори.  Годишниот надомест кој националните телевизии ќе го плакаат на операторот ОНЕ е 99.840 евра. Сумата за регионалните телевизии пак изнесува околу 13 илјади евра.