Орав:Реформата на јавната администрација останува приоритет

Добивај вести на Viber

Единствено ефикасна и функционална администрација може да осигура дека сите обврски за членство во ЕУ се имплементираат насекаде, изјави евроамбасадорот Аиво Орав за кого администрација е многу важен дел за политичките критериуми, но и приоритет за пристапување. За време на конференцијата „Пресретнување на предизвиците на јавната администрација“, тој посочи дека за реформата во јавната администрација биле наменети 13,5 милиони евра минатите 5 години и е втората најголема област на поддршка од ЕК преку ИПА. Реформата на јавната администрација останува приоритетна и во пакетот 2014-2020, додаде евроамбасадорот. За министерот за информатичко општество и администрација Иво Ивановски, веќе се прават реформи во јавната администрација и тоа не само поради исполнување на критериумите за пристап во ЕУ, туку како што рече,  заради самите нас, за граѓаните и потребата за професионалност и услужливост кон сите корисници на нејзините услуги. „Пристапивме кон имплементација на реформите, знаејќи дека се работи за долг и макотрпен пат кој бара преземање бројни чекори, кои понекогаш нема да бидат популарни и од секого прифатени“, изјави Ивановски кој додаде дека во тек е проектот „Пресретнување на предизвиците на јавната администрација“, преку кој со обуки ќе бидат опфатени 1250 јавни и државни службеници од кои 450 од немнозинските заедници. Во текот на конференцијата беа посочени двата нови нацрт-закони за административните службеници и за вработени во јавниот сектор, кои се во фаза на донесување.