Осмо издание на Баскерфест, 30 концерти и многу акробации
Објавено во: Мои пари 11 Јуни, 2013
Со возбудлив настап на Трупата „II Posto” од Италија, во петок во 19 часот пред Веро центарот ќе биде отворено годинешното осмо издание на Баскерфест. Како покровител на уличниот фестивал е Град Скопје, од чија каса ќе се потрошат 900.000 денари.
Баскерфест и годинава ќе трае 10 дена, а посетителите ќе уживаат во спектакуларните акробации на артистите од цел свет. Настапот на италијанската трупа е комбинација на акробатски вертикален танц со музика во живо и спектакуларна кореографија индивидуално креирана за секој настап. По свеченото отворање, пред Веро центарот ќе се претстават и преостанатите настапувачи со кратка изведба на своите точки.
За време на фестивалот ќе бидат одржани околу 30 концерти, а годинава Баскерфест ќе се прошири и низ цела Македонија.
„Почнуваме утре на 12-ти со настапи во Гевгелија, на 14-ти во петок се селиме во Скопје, каде што остануваме до 23-ти, а на 3 јули ќе завршиме во Дојран. На 8. Баскерфест ќе настапат околу 100 артисти од дваесеттина земји. Еден од поспектакуларните настапи покрај настапот на италијанската трупа „II Posto ”, ќе биде и настапот на рок групата „Стар бој“ од Нов Зеланд, група составена од 9 членови која во своите настапи комбинира акробатска кореографија и употреба на пиротехнички елементи“, изјави Пане Темов од Здружението на граѓани „One way“ кои се организатори на фестивалот.