Осуда за тепањето на новинарите од „За заедничка Македонија“ - Напаѓачите да одговараат

Добивај вести на Viber

Иницијативата За заедничка Македонија го осуди тепањето на новинарската екипа на веб порталот А1 он и побара воздржаност.

„Го осудуваме инцидентот за кој јавуваат дел од медиумите. Апелираме на избегнување и воздржување од провокации од секоја страна и од секој поединец. Ги повикуваме надлежните институции да ги пронајдат сторителите со цел да се откријат вистинските мотиви и позадината на истиот. Ние сме тука за Македонија, за Заедничка Македонија, и од тоа нема да отстапиме“, се наведува во објавата на иницијативата.

Двајца медиумски работници на порталот А1.он, снимателот Владимир Желчевски и новинарот Александар Тодевски се брутално нападнати од петмина учесници на вечерашниот протест пред Собранието. Според очевидец на настанот, учесници на протестот ја нападнале екипата на А1.он пред Триумфалната капија, ја оштетиле камерата и ги претепале новинарите, по што еден од известувачите на порталот бил во конфузна состојба и се пожалил на повреди, а интервенираше и екипа на брза помош.

„Со тупаници по глава и по телото вечерва беа нападнати снимателот и новинар на А1он од демонстрантите пред Собранието на Република Македонија. И двајцата со возило на брза помош беа пренесени во ургентен центар. Дел од демонстрантите ја искршија и камерата на А1он по што избегаа од местото. Граѓанската иницијатива ‘За заедничка Македонија’ која е организатор на протестот очигледно не успеа да ги заштити медиумските работници, А1он ќе поднесе пријава против организаторот и ќе бара надомест на штета за дивјачкото и примитивно однесување“, објави во својата реакција порталот А1 он.