Добивај вести на Viber
Уште еден случај утврди Царинската управа на неправилности при работењето кај компанија увозник на електрична енергија. При контролата откриено е дека компанијата нема поднесено увозни царински декларации за дел од увезената електрична енергија со што избегнала плаќање на давачки во вкупен износ од околу 262,6 милиони денари.
- Од увезените 1.047.554 Mwh електрична енергија, констатирано е дека 417.511 Mwh со вредност од 20.686.762 евра, се бесправно отстранети од под царински надзор без да бидат платени давачки согласно закон. Со вакво постапување фирмата избегнала плаќање на давачки во вкупен износ од околу 262.6 милиони денари (4.3 милиони евра) од кои околу 229 милиони денари на име ДДВ и 33.6 милиони денари на име камата и компензаторна давачка, се наведува во соопштението.
Од Царинската управа информираат дека за утврдените неправилности се донесени решенија за дополнителна наплата на царински долг и оти ќе биде поднесена и соодветна пријава.
Претходно, беа утврдени неправилности во работењето кај тројца увозници на електрична енергија од Скопје за што беа донесени решенија за дополнителна наплата на царински долг во вкупен износ од околу 113 милиони денари. Решенијата за наплата на давачки за четирите компании изнесува 375,6 милиони денари.