Отстранети нелегалните рампи за наплата на паркинг во центарот на Охрид

Добивај вести на Viber

Локалната самоуправа согласно најавите утрово ги отстрани нелегално поставените рампи за наплата на паркинг-просторот во центрот на Охрид, за кои беше оценето дека го попречуваат нормалното функционирање на сообраќајот во најспецифичниот простор во градот. Од локалната власт уште најавуваат дека во текот на утрешниот ден ќе бидат извршени активности за отстранување на бетонираните основи на кои беа поставени отстранетите рампи и паркинг-апаратите.

Градоначалникот на Охрид Никола Бакрачески минатата седмица најави дека просторот за паркирање во центарот на градот и околните улици ќе биде слободен за движење, додека како штетен ќе биде раскинат и договорот за закуп на паркинг-просторот.

- Компромис нема да има со никого, кога се работи за спроведување на законот и штитење на интересите на граѓаните на Охрид, стои во соопштението од Кабинетот на Бакрачески.

Според него, давањето на управување на паркинг-просторот на приватен субјект за локалната самоуправа претставува штетен договор, донесен под сомнителни околности, во нетранспарентна постапка и претставува акт на нарушување на интересите на општина Охрид и нејзините граѓани. Оттаму најавите дека општината ќе ги преземе сите законски средства да го раскине договорот.

Локалната самоуправа најави и покренување пријави против сите лица инволвирани во потпишувањето на договорот, односно субјектите кои со своите постапки свесно направиле злоупотреба на својата позиција, правејќи штета по имотот и угледот на општина Охрид.