Отворен мултифункционален културен дом во Автокоманда

Добивај вести на Viber

Синоќа во населбата Автокоманда, во Општина Гази Баба, свечено беше отворен Културниот центар „Димитар Влахов“, во кој ќе бидат сместени културен дом, библиотека и најсовремено музичко студио за снимање филмска музика на компанијата „Феимс“ од Франција.

Културниот центар е направен по пат на јавно-приватно партнерство, помеѓу Општина Гази Баба и француската компанија „Феим“, а беше отворен свечено во присуство на амбасадорот на Република Франција во Република Македонија, Кристијан Тимоние, министерот за култура Роберт Алаѓозовски, градоначалникот на град Скопје Петре Шилегов, преставниците на компанијата „Феимс“, членови на Советот на Општина Гази Баба, градоначалникот на општината Борче Георгиевски и жители на општината.

Министерот Алаѓозовски посочи дека децентрализацијата во културата е еден од главните приоритети во Стратегијата на културата на оваа Влада, која се води од мотото: „Култура до сите-култура за сите“. „Со Стратегијата се обврзуваме дека ќе ги поддржиме сите иницијативи на општините да основаат  нови културни установи или да го зголемат бројот на институции под нивна надлежност. Ја поддржавме Општина Гази Баба во трите различни иницијативи што ги има, а  во оваа насока ние сме отворени и кон предлозите на други општини од земјава“, истакна министерот Алаѓозовски.

По повод отворањето на центарот и меѓународниот Ден на театарот, беше изведена театарската претстава „Островот на скриеното богатствао“, на аматерскиот театар „Чекори“.