Отворена фабрика на Пекабеско вредна 13 милиони евра!

Добивај вести на Viber

Компанијата Пекабеско  го пушти во употреба новиот производствено-логистички центар за производство на месни и сувомеснати производи, инвестиција вкупно вредна 13 милиони евра. Од нив 9,5 милиони се обезбедени преку кредит од  Европската инвестициска банка (ЕИБ) и Македонската банка за поддршка на развојот, а останатите се сопствени средства на компанијата. Министерот за земјоделство, шумарство и водостопанство Љупчо Димовски вели дека центарот е изграден по сите европски и ХАСАП  стандарди за производство на сувомесни производи. - Фабриката има капацитет за производство од 35 тони на ден, конфекционирање на свежо месо, производство на паштети, складирање  и расекување на свежо месо, пакување на смрзната риба, пакување на смрзнат зеленчук и овошје и магацини со 7.000 палетни места на сите режими на лагерување. За сето ова да се постигне ќе бидат потребни најмалку 30 тони свежо или замрзнато месо како суровина дневно, рече Димовски. Директорот на Пекабеско, Слободан Кутревски рече дека во компанијата има 310 вработени, во тек е оглас за 50 нови работни места, а кога ќе го достигне својот полн капацитет, ќе бидат вработени дополнителни 200 луѓе. - Обејктот е направен по сите техничко-технолошки стандарди. Технолошкото решение за изградба на објектот го направи швајцарска компанија запазувајќи ги сите европски нормативи и стандарди во производство и дистрибуција за центарот да добие и европски извозен број, посочи Кутревски. Компанијата, додаде, покрај на македонскиот присуствува и на пазарите во Босна и Херцеговина, Црна Гора,  Косово и Србија. Инаку, овој капацитет со своето работење претставува заокружување на ланецот во нашето примарно земјоделско растително и сточарско производство и преку финализацијата во производството на прехрамбените производи. Министеро смета дека тој е одличен пример и потврда на градењето политики на Владата, која внимание, како што рече,  посветува токму на земјоделскиот сектор кој покрива голем дел од територијата на државата и игра клучна улога во одредувањето на состојбата на руралната економија. Димовски информира и дека на барање на месната индустрија Владата предложила пакет измени на ИПАРД програмата пред Европската комисија при што во иднина ќе се кофинансираат инвестиции во делот на градежи зафати и опрема, прилагодување и модернизација на производството и воведување иновативни технологии и нови производни линии, набавка за опрема за пдобрување и модернизација на производните технологии за преработка, пакување и маркетинг. Инвестицијата на Пекабеско,ќе значи многу и за општина Илинден. Градоначалникот Жика Стојановски вели дека ќе помогне во намалување на невработеноста во општината и ќе придонесе за подобрување на условите за живеење Ј.Ј.