Пад на невработеноста за 0,3 одсто
Објавено во: Економија 09 Јуни, 2015
Според најновите податоци на Државниот Завод за Статистика, во првото тримесечје од оваа година, стапката на невработеност падна на рекордно најниско ниво од 27.3%, што претставува пад од 0,3 одсто во споредба со последниот квартал од 2014 година кога изнесуваше 27.6%.
Стапката на вработеност изнесува 41.6% а стапката на активност 57.3%. Корицата на информацијава е полна со шаренило, но нејзината содржина е во 50 нијанси на црно.
Тажно е што 27.3% е рекорд во најниска стапка на невработеност. Уште потажно е што стапката на невработеност на млади е речиси двојно повисока, 47,6%, млади од 25 до 49 години.
Според властите, стапката на невработеност се намалила како резултат на владините активни мерки за намалување на невработеноста. Нели овие мерки се насочени за вработување токму на млади лица?
Ако е така, тогаш тие не се факторот што придонел за „рекордната“ стапка на невработеност.
Доказ за тоа се кафулињата кои во 12 часот на пладне вријат од младина, метежот низ улиците во секоја доба од денот и се поголемиот број познаници кои „туристички“ заминуваат по белиот свет, заработувајќи како бејбиситери, келнери и кувари.
Тажна е и улогата на образованието. Ако ја разгледаме структурата на невработените лица според степенот на образование, не удира шок.
Најголем дел од невработените лица се со четири годишно средно образование 119 312 лица, а во последниот квартал на 2014 овој број изнесувал 131 712 лица, и со високо образование бројот изнесува 41 469 невработени лица.
Од вкупно 697.248 вработени во земјава, најголем дел се ангажирани во преработувачката индустрија и во земјоделството.
Онаа народната „Учи синко за да не работиш“ се исполнува. Ама во сосема спротивен концепт.