Добивај вести на Viber
Автопатот Приштина-Блаце ќе го гради американско-турскиот конзорциум „Бехтел-Енка“, одлучи косовската владина комисија задолжена за реализација на проектот.
Пресудна беше најниската цена - „Бехтел-Енка“ за реализација на проектот побара сума од 599.944.263 евра, додека вториот понудувач, италијанско-турскиот конзорциум „ЦМС- Доугс“ за изграба на автопатот понудил цена од 756.060.580 евра.
Конзорциумот „Бехтел-Енка“ претходно го изгради и автопатот кој ги поврзува Албанија и Косово - на албанска страна делницата Драч-Кукс-граничен премин Морина, кого Албанците го нарекуваат „Патот на нацијата“, како и делницата Морина-Врмица до Мердаре, која во Косово е позната како автопат „Ибрахим Ругова“.
Автопатот од Приштина до преминот Блаце, на границата со Македонија е во должина од 55 километри и треба да биде изграден во рок од 42 месеца по потпишувањето на договорот. Ќе има три тунели од кои најголемиот ќе биде кај Качаник, со должина од 2,2 километра и повеќе мостови.