Паднаа остри критики за најавата на Филипче околу задолжителното вакцинирање
Објавено во: Македонија 22 Април, 2018
Жестоки критики се појавија како резултат на најавата вакцинирањето да биде услов за запишување во градинка и во училиште. Критики кон министерот за здравство, Венко Филипче, на социјалните мрежи упати пратеникот од владејачката коалиција Горан Милевски. Според него никој нема право да ги уценува родителите да ги вакцинираат децата.
„Образованието треба да биде достапно за сите, а во 21 век да им се заканувате на родителите дека децата ќе им останат неписмени ако не се вакцинираат е срамота. Ги отфрлам ваквите најави и жестоко ќе се спротивставам на конзерватизмот кој се промовира“, вели Милевски.
Министерот Филипче вчера најави дека условот ќе важи од септември, а дотогаш треба да се усогласат и законските регулативи. Мерката ја правда со фактот дека Македонија минатата година доживеа драстичен пад на опфатот на вакцинација кој беше 91 процент, иако за колективен имунитет потребно е над 95 отсто од децата да се вакцинирани. Идејата на Филипче ја поддржува и Комитетот за имунизација.