Падот на извозот ги фрла во очај бизнисмените, ќе има ли поддршка од Владата?

Добивај вести на Viber

Економската криза продолжува да го јаде македонскиот извоз. Државниот завод за статистика објави неповолни податоци- продажбата на македонски производи на странските пазари во периодот од јануари до септември е намалена за 12,2% споредено со истиот месец лани. Пад на извозот е регистриран кај речиси сите производи – кај минералните горива, кои главно се извезуваат во Косово, 36,9%, кај суровините 13,8%, продажбата на хемиски производи е намалена за 13,2%, а на готови производи за 10,9%. Единствено зголемување на извозот има во ставката машини и транспортни услуги за 16,8%, пијалаци и тутун за 8,5% и кај извозот на животински и растителни масла за 4,4%. Менаџерите на извозните компании се загрижени дека побарувачката за македонски производи од странство ќе продолжи да се намалува, со што ќе бидат принудени производството да го сведат на минимум, а дел од вработените да ги пратат принудно на одмор. „Уште од март почна да се чувствува кризата кога сите останаа без работа, тоа до ден денеска е случај, има многу компании кои не можат да ги пополнат капацитетите. Се соочуваме со перманентно намалување на производството годинава а ниту за наредната имаме сјајни прогнози. До крајот на годинава ќе имаме за 20% помало лон производство споредено со лани“, изјави Владимир Нетков, сопственик на конфекцијата Милано. Загрижувачки за економијата е што очекувањата на бизнисмените и за догодина се песимистички. Како последица од економскиот стрес во европските економии, Народната банка ги корегираше и проекциите за економијата годинава. „Новите полоши очекувања се темелат на падот на надворешната побарувачка, односно лошата состојба еврозоната, главна извозна дестинација за македонските компании. Растот догодина ќе го предводат најавените јавни и приватните инвестиции“, изјави гувернерот Димитар Богов. Богов потврди дека побарувачката од странство ќе паѓа и догодина и поради тоа закрепнувањето од рецесијата ќе биде бавно. Сепак, проекциите за 2013 се дека БДП ќе порасне до 2,6%. Но, факт е дека бизнисот преживува критичен период, бидејќи, освен падот кај извозот, статистиката измери и намалување на индустриското производство од 6,9% во периодот од јануари од септември. Бизнисмените веќе побараа конкретни мерки за надминување за решавање на проблемот. “Потребно е да се формира државен гарантен фонд за економски развој со основачки влог од 60 милиони евра со кој ќе се помогнат извозните компании за обезбедување на нивните кредити пред домашните банки, како и во делот на обезбедувањето на 50 процентно учество во користењето на средствата од европските фондови, проблем со кој се соочуваат поголемиот дел од компаниите“, изјави Бранко Азески, претседател на Стопанската комора на Македонија. Според Азески, на ваков начин ќе се поттикне извозот и производството, а со тоа и компаниите ќе се  спротивстават на кризата. С.Н.