„Пакомак“ собра рекордно количество отпад од амбалажа

Добивај вести на Viber

Вкупно 9.227 тони отпад од пакување лани собрало и рециклирало Друштвото за управување со пакување и отпад од пакување „Пакомак“. Најголемо количество на отпадна амбалажа била хартијата - 4.246 тони, потоа 3.560 тони пластика, 1.354 тони стакло, како и  2,43 тони метал и 65 тони дрво, покажуваат податоците. „Пакомак“ лани успеал да го подобри собирањето на отпад од амбалажа за 18 отсто во однос на претходната година, кога собрало 7.500 тони отпадна амбалажа. Минатата година оваа компанија инвестираше и во развој на комунална инфраструктура за селективно собирање отпад во поголемите градови, склучување договори со јавните комунални претпријатија со другите општини, како и продлабочување на соработката со своите бизнис-партнери. Друштвото во својот систем за собирање и рециклирање на отпад вклучува 680 компании кои годишно создаваат околу 40.000 тони отпад од амбалажа. Лани со посредство на „Пакомак“, Виена му донираше на Скопје два камиони за чистење и собирање отпад и еден камион за чистење снег. Друштвото донираше и 20 контејнери и еден камион за собирање отпад на општина Тетово.