ПАНДЕМИЈАТА ГИ СТАВИ НА ЧЕКАЊЕ: Во прашање доведено одржувањето на параглајдерските натпревари во Крушево

Добивај вести на Viber

Поради пандемијата на коронавирусот, во прашање е доведено одржувањето на четири параглајдерски натпревари во Крушево.

Тие треба да се одржат летово, почнувајќи од месец јули, но поради затворените граници неизвесно е дали воопшто ќе може да се реализираат овие настани. Од Општина Крушево немаат конкретен одговор дали куповите ќе може да се одржат.

„Сето тоа останува под знак прашалник, иако имавме првенства за јули, август. Следите дека сите европски земји донесуваат различни одлуки. Поединечно доаѓаат Македонци за летања, но натпревари со 150 учесници каде има уште толку луѓе кои се дојдени да ги следат не знам дали воопшто ќе може да се одржат. Еден натпревар носи од 120 до 150 учесници, плус луѓе кои се дојдени како придружба. Ако зборуваме статистички, тоа се 9.800 посетители кои поради параглајдерските натпревари лани дошле во Крушево, а сега штети трпат хотелите, рестораните, приватните сместувачи, кафетериите, едноставно туризмот е на чекање“, вели Коста Мицкоски, раководител на одделението за локален економски развој во Општина Крушево.

Тој додава дека лани со куповите за параглајдерство привлекле гости од Турција, Грција, Србија, Бугарија, Аргентина, Бразил, Хрватска, Русија, Јапонија, Франција, Италија и многу други земји.

„Заедно со натпреварувачите доаѓаа и многу физиотерапевти кои ги нудеа своите услуги. За споредба, во месец март годинава имало само 7 туристички посети во градот“, објаснува Мицкоски.

Претходните години, градот имаше добри резултати на полето на туризмот.

Во 2018 година Крушево за 50 отсто ги зголемило туристичките ноќевања. 

Крушево во 2018 година имало 15.853 домашни туристи кои реализирале 41.801 ноќевање, а истата година дошле 2.592 странци кои реализирале 18.144 ноќевања. 

Македонија изминативе години беше рангирана како топ дестинација за посета, а познати блогери и магазини советуваа да се посетат Матка, Охрид, Крушево.