Добивај вести на Viber
Стечаен управник кој ќе успее за една година да реорганизира фирма за која е отворена стечајна постапка може да земе награда од 2.000 до дури 240.000 евра! Наградата зависи од сумата со која ги обесштетил доверителите на фирмата - ако успее да намири 5.000 евра кај доверителите, му следува награда од 2.000 евра, ако ги обесштети со 24.000 евра наградата се зголемува на 5.000 евра, пишува „Дневник“.
Ова е предвидено во новиот Правилник за награди што го изработи Министерството за економија за да ги мотивира стечајните управници да се ангажираат повеќе околу фирмите и побрзо да ја затвораат стечајната постапка.
Наградата во случај на реорганизација се исплаќа 100 проценти ако стечајната постапка е заклучена во рок од една година. Kога стечајната постапка трае повеќе од една година, наградата се намалува по 4 отсто месечно во наредните 18 месеци, така што по навршување на вкупно 30 месеци, наградата ќе изнесува најмногу до 28 отсто.
Од Министерството за економија велат дека ова е награда за извршена работа исто како и кај другите професии: нотар, извршител, адвокат, проценител и како и кај сите нив, наградите се регулирани со правилник.