Партиите и денеска на митинзи, кампањата се ближи кон крајот

Добивај вести на Viber

Кампањата се ближи кон крајот, а на партиите им остануваат уште шест дена за претставување на програмите со кои ќе ја бараат довербата од гласачите. 

ВМРО­-ДПМНЕ и коалицијата „За подобра Македонија“ ќе одржат митинзи во Кратово, Пробиштип и Крива Паланка.

Koaлицијата на СДСМ „За подобар живот“ денеска ќе одржи митинзи во Ресен и Битола. Претходно во Битола, пред Центарот за социјална работа во населба Карпош, изјава за медиуми ќе даде Радмила Шекеринска, заменик претседателка на СДСМ и носителка на кандидатската листа во ИЕ 5.

Носителот на кандидатската листа за ИЕ 1, Ден Дончев на коалицијата „ВМРО за Македонија“ денеска од 12 до 14 часот ќе оствари средби со граѓаните на Аеродром, пред трговскиот центар Бисер, како и на Кисела Вода, на просторот пред рампа.

Централниот караван на „Коалицијата за промени и правда“, предводена од Демократскиот сојуз, денеска во 13 часот ќе одржи митинг во Радовиш, на кој ќе се обратат лидерот на ДС, Павле Трајанов и носителот на листа во ИЕ 4, Слободан Богоески. Потоа претставници на коалицијата ќе имаат средби во селата Дедино и Ракитец, а митинг ќе се одржи и во Конче, со почеток од 17 часот.

Претставниците на коалицијата „Преродба со Беса“ денеска ќе имаат средба во Чаир со поранешните политички осуденици.  Во 13,30 часот ќе одржат конференција за медиуми и ќе го презентираат проектот „Кораби 2025". Потоа коалицијата ќе има средби со граѓаните во повеќе населени места од општина Гостивар.

ДУИ денеска ќе одржи конференција за медиуми во Тетово за досегашниот тек на кампањата. Али Ахмети, претседателот на ДУИ ќе има средби со граѓаните во општина Чаир, а централен собир ќе има во Куманово.