Павлопулос повторно со радикални изјави кон Македонија

Добивај вести на Viber

Солун е буден чувар на грчкиот карактер на Македонија, изјави денеска грчкиот претседател Прокопис Павлопулос, објави Телма. 

Тој присуствуваше на свечената литургија во Солун, по повод годишнината од ослободувањето на градот и празникот Св. Димитрија. Тој по 3 пат во рок од  една седмица  испрати порака со која алудира дека Македонија е грчка. 

„Денот на одбележувањето на светиот спомен на заштитник на Солун, Св. Димитрија е и годишнина од значајниот тек на Солун, од една страна во историјата на грчкиот народ и православието. А од друга страна, како арка и буден чувар на грчкиот карактер на Македонија, кој не може да се оспори и за кој не се преговара“ - изјави Павлопулос. 

Тој минатата недела два пати изјави дека Македонија е грчка и испрати радикална порака до македонската влада дека со  фалсификување на грчката историја, Македонија нема да  стане дел од Европската Унија. 

Претходно на неговите изјави реагираше шефот на македонската дипломатија, Никола Попоски. 

„За воопшто да се говори за почитување на европското право од грчка страна, за почеток е добро да се удостои пресудата од Меѓународниот суд на правдата од 2011 година. Без тоа, секое споменување на правото е себе-демантирање“- рече Попоски. 

Аналитичарите сметаат дека ваквите изјави можат да ги вложат односите меѓу двете земји.