Петар Рупески го фати Светиот крст во Охрид

Добивај вести на Viber

 Петар Рупески од Варош е среќникот кој денеска меѓу неколкуте стотини верници, успеа по вторпат да го извади Светиот крст што во осветените води на Охридското Езеро го фрли владиката Јосиф, митрополитот на Тетовско-гостиварската епархија.

- Мошне сум среќен и јас, моите пријатели и моето семејство што го фатив крстот. Ова е вторпат како го фаќам крстот. Првиот пат тоа беше во 2005 година и навистина тогаш ми донесе многу среќа во животот. Посакувам секој да го фати крстот и да го доживее она што не можам да го опишам со зборови, изјави Рупески.

 Според обичаите Рупески со неговата тајфа, ги посетуваат семејствата низ градот, кои го даруваат крстот со пари, за здравје и среќа. Годинашните кумови, градоначалникот на Охрид Никола Бакрачески и стопанственикот Сашо Симески, покрај другите подароци, ќе го даруваат и со сребрен крст со позлата, тежок над еден килограм.

Дваесеттина илјади верници денеска присустуваа на одбележувањето на празникот Богојавление – Водици во Охрид. Во вода влегоа неколку стотини од 1.300-те пријавени како од градот, така и од другите градови во земјата, но и гости од Србија, Бугарија, Чешка, Шпанија...

На манифестацијата по повод Водици во Охрид присуствуваа голем број личности од политичкиот и јавниот живот, како од градот, така и од државата, но и од соседните држави и од светот.