Петков ги отфрли тврдењата дека на 22 мај со македонската Влада ќе потпишат некаков документ
Објавено во: Македонија 13 Мај, 2022
Бугарскиот премиер Кирил Петков денеска во Софија пред пратениците ги отфрли тврдењата дека на 22 мај во Македонија двете влади ќе стават потпис на конкретен документ. Петков изјави дека дури и доаѓањето на бугарската делегација не е финализирано.
„Средбата се уште не е финализирана, но едно е сигурно, ние само го продолжуваме конструктивниот дијалог, но нема да биде потпишано ништо конкретно“, рече Петков.
Македонскиот премиер Димитар Ковачевски вели дека министерствата за надворешни работи на Македонија и Бугарија комуницираат, но нема усогласен документ. Тој не сака да ги крева очекувањата за деблокада во јуни и вели дека не се врзува со датуми.
Македонскиот тим во Заедничката мултидисциплинарна експертска комисија за историски и образовни прашања со Бугарија по дводневната средба во Софија соопшти дека разговорите поминале во конструктивна атмосфера.