„Пиј музика – слушај вино“ – Скопјани по трет пат ќе уживаат во виното

Добивај вести на Viber

Еден цитат од роман на Гоце Смилевски вели: "Животот е премногу сложен и тежок, па единствената утеха ни е убавината". А што асоцира на убавина, ако не: вино, дружење, музика, уметност...? Винскиот фестивал во организација на Скопски саем, ја слави токму убавината на живеењето во форма на дружење со позитивна енергија, уметноста на виното како подготовка и како конзумирање и сето тоа зачинето со квалитетна музика. Групацијата ЕРА – Скопски саем на третиот по ред Меѓународен ВИНСКИ ФЕСТИВАЛ, што ќе се одржи од 06. до 08.12.2013 година во Метрополис Арена ги поканува сите граѓани над 18 години да го проведат своето слободно време со квалитетно избрано вино и музика. Исто така ги советуваат гостите да користат такси или друг превоз кој нема да бара активни возачки способности. Овој фестивал е доказ дека Македонија е земја на виното, кое се произведува со различни брендови, сорти и мешавини и дека успешната извозна стратегија може да придонесе оваа индустрија да стане национална гордост и препознатливост. Исто така за време на овој фестивал ќе се одржи најголемата забава после работното време на ден 06.12.2013, почнувајќи од 17.00 часот каде поканети се сите поголеми македонски компании. Идејата е овој фестивал да даде дополнителна вредност на живеењето на Скопјани, кои се почитувачи на добрата забава и квалитетниот провод. Винскиот фестивал на Скопски саем накратко би требало да биде синоним за денови и ноќи, исполенти со квалитетна содржина, нови искуства и добра музика. Целта на традиционалното организирање на ВИНСКИОТ ФЕСТИВАЛ е промоција на богатата винска култура во Република Македонија, но и проширување на семејството на вински ентузијасти. Пред сѐ, целта на фестивалот е да се негува и развива култот кон виното - така ја негуваме сопствената традиција. - изјави проект менаџерот на Вински фестивал, Иво Ивановски. По попладневните забави со DJ, музичката програма продолжува и по 19:00 часот сè до 01:00 часот по полноќ. Во Метрополис Арената ќе присуствуваат бројни винарски визби, а вкусот на виното ќе биде дополнет со дегустација на млечни и месни производи од најквалитетните производители. Музичката програма на фестивалот се состои од имиња на домашната и регионалната сцена кои ќе се погрижат за доброто расположение во духот на виното:

06-08.12.2013 - попладневни забави со DJ 17:00 - 19:00

06.12.2013 – Жаклина Стефковска 19:00 - 21:00;

                         Драган Мијалковски 21:00-23:00 и

                         НОКАУТ 23:00 - 01:00

07.12.2013 – Скопски Чалгии 19:00 - 21:00

                       Чалгија Sound System 21:00 - 23:00

                       Нино Величковски со Кумановски тамбураши 23:00 - 01:00

08.12.2013 – Трио Симон Киселички 19:00 - 21:00

                       Стринг форсис 21:00 - 23:00

                       THE FRAJLE (Р.Србија) 23:00 - 01:00

Ефективниот спој на забавното со корисното посетителите ќе можат да го искусат и преку дегустацијата на повеќе производи и истовремена споредба на квалитетот и вкусот. Ќе се претстават најпознатите сорти грозје, категориите на вино и нивниот редослед во служење, основната поделба на храната по состав и примена, комбинирање на соодветно вино со јадење на основа на нутриционистички состав и органолептички карактеристики, професионално служење вино во ресторани, протокол во винскиот сервис, правилен начин на отворање и служење итн. Учесници на годинешниот фестивал се винарските визби, производители на млечни и месни производи. Нивните производи ќе бидат достапни за купување на самото место. Оваа година партиципираат 17 учесници. Мотото на фестивалот е пиј музика, слушај вино, а цената на билетот изнесува симболични 100 денари.