По ОБСЕ, МИА, „Чичко Кумплунг“... и Бејли му реагираше на Чилиманов да се прибере

Добивај вести на Viber

Голема прашина крена статусот на Цветин Чилиманов, преку кој повика на сексизам против новинарка на „Фајненшл Тајмс“.

На ваквата ситуација реагираше и американскиот амбасадор во Македонија, Џес Бејли кој остро го осуди ваквото однесување на Чилиманов.

„Повикот на насилство против новинар е срамно. Цветин треба да се засрами“, порача Бејли.

Претставникот на ОБСЕ за слобода на медиумите Харлем Дезир најостро го осуди твитот на ноивнарот на МИА Цветин Чилиманов, кој е и потпретседател на Македонската асоцијација на новинари (МАН), упатен кон дописничката на Фајненшл Тајмс, Валери Хопкинс, која го покриваше референдумот во Македонија.

Заканувачкиот твит на Цветин Чилиманов кон Валери Хопкинс е срамен и неприфатлив. Сите закани кон новинари, особено повиците за насилство кон жени новинарки се неодговорни. Чилиманов мора веднаш да го отстрани твитот, напиша Харлем Дезир на Твитер.

Во меѓувреме, Македонската информативна агенција (МИА) во целост се огради од твитот објавен на социјалната мрежа Твитер, на нејзиниот вработен Цветин Чилиманов. МИА во рамки на своите надлежности ќе ги преземе сите мерки за утврдување на фактичката состојба и зачувување на угледот на Агенцијата, во согласност со законските прописи, се вели во реакцијата од агенцијата.

Кон низата осуди на сметка на твитот на Чилиманов се надоврза и актерот Јовица Михајловски, кој го толкува ликот на чичко Кумплуг во филмот „Самоуништување“. Тој меѓу другото го потсетува зошто судбината овој лик била трагична.

„Овој Цветин, што го бербати ликот и делото на чичко Кумплунг, да го потсетам дека Кумплунг заврши во инвалидска количка, токму заради сторените дела на кои сега повикува ангажираниот Чилиманов. Го охрабрувам, тој и сите што го делат неговиот став, до крај да ја споделат судбината на ликот Кумплунг и да завршат на ист начин“ – напиша актерот на фејсбук.

До овој момент изостана реакција од надлежните институции, кои по допрен глас можат да гонат поради говор на омраза како кривично дело.

За потсетување, Цветин Чилиманов како новинар во МИА беше дописник од Вашингтон, но за време на политичката криза стана синоним за партиски мегафон, при тоа честопати гостувајќи по дебатните емисии, како аналитичар, при тоа споделувајќи и бранејќи ставови на иста линија со ставовите на ВМРО- ДПМНЕ.