Починатиот 24 годишен ресенчанец сам побарал да се лечи дома, велат од Министерството за здравство

Добивај вести на Viber

Починатото 24 годишно момче само побарало да се лечи дома, велат од Министерството за здравство. 

Тој утрово починал во Клиничката болница, каде бил примен пред три дена. Министерството за здравство информираше дека на 24 август тој бил примен на инфективното одделение во битолската болница како суспектен на вирусот во тешка здравствена состојба, со ниска сатурација и отежнато дишење, имал масивна бронхопневмнонија. Иако на него му била дадена терапија и е ставен на кислородна поддршка, пациентот, како што наведуваат од министерството, одбил да остане на болничко лекување. Лекарите го запознале со неговата сериозна здравствена состојба, но тој побарал да биде пуштен на домашно лекување.

„По потпишана изјава дека си оди на сопствена одговорност, пациентот е испишан со препишана терапија која треба да ја прима во модуларната болница во Ресен. Следниот ден, на  25 август, пациентот е донесен од Општата болница Охрид за хоспитализација во Клиничката болница Битола. Веднаш хоспитализиран во тешка општа состојба со ниска сатурација, поставен на двојна кислородна поддршка, интензивна терапија, но и покрај тоа постојано му се влошува состојбата и паѓа сатурацијата. На 27 август утрото и покрај обидите на лекарите да го спасат, пациентот починал. Во системот не се заведени коморбидитети кај пациентот и тој не бил вакциниран“, велат од министерството.

Инаку, момчето неодамна правело свадба, јави ММС, а се претпоставува дека се заразил од некој од гостите. 

foto Wikipedia