Почна жетвата во Пелагонија-првото класје не го даде очекуваниот род!
Објавено во: Агробизнис 02 Јули, 2013
Во битолскиот дел на Пелагонија денеска почна жетвата на пченицата, информираат од подрачната единица на Министерството за земјоделство, шумарство и водостопанство во Битола.
Според податоците на подрачната единица на министерството за земјоделство во Битола жетвата се одвива на повисоките делови на Пелагонија, односно во атарот на селата Бач и Гермијан кои се наоѓаат во непосредна близина на македонско-грчката граница.
Во битолскиот регион со пченица годинава се засеани околу 17.000 хектари, а првичните информации со кои располага подрачната единица на Министерството за земјоделство во Битола се дека приносите се слаби.
„Првичните информации од терен не се добри, приносот не задоволува бидејќи првото класје не го даде очекуваниот род. За жал временските услови си го направија своето“ истакна раководителот на подрачната единица, Илија Србиновски.
Во овој регион во тек е и жетвата на јачменот кој годинава е засеан на површина од 5.000 хектари, а веќе е завршена и жетвата на маслодајната репка која беше засеана на површина од 1.500 хектари.
Агро-експертите потврдуваат дека годинава има послаб род и кај масолдајната репка, и истиот се движи од 1.000 до 1.200 килограми по хектар.
Можеби ќе ве интересира
ВО МАКЕДОНСКИТЕ ПЧЕЛАРНИЦИ СÈ ПОЧЕСТО ИМА ДРВЦА ПАУЛОВНИЈА: Кој е бенефитот од нив?
