Помали плати за државните службеници во Грција

Добивај вести на Viber

Да ги намалат платите за новите државни службеници и да ги отстранат автоматските зголемувања на платите за Грците кои заработуваат минимална плата во приватниот сектор, ова го побара тројката меѓународни кредитори од грчките власти. Во разговорите меѓу грчката Влада и нејзините кредитори е направен напредок, но исчезнале сите надежи дека тројката на состанокот на Еврогрупата во понеделник ќе го презентира договорот за  т.н. ниво на персонал, пишува „Катимерини“. Во текот на дискусиите се додадени и нови прашања, а едно од нив е дека треба да се намалат платите за оние кои ќе влезат во државната служба првпат. Во моментов, нов вработен во јавниот сектор со универзитетска диплома заработува бруто плата од 1.090 евра. Добро упатени извори соопштиле дека  грчката Влада најверојатно ќе го прифати предлогот на тројката. Според весникот  тројката бара од Владата да го укине и автоматското зголемување на примањата за оние со минимална плата, која во моментов изнесува 586,08 евра  месечно. Од страна на тројката побарано е и воведување нова шема според која работодавците ќе можат да ги задржат работниците на иста плата без оглед на стажот. Според постоечкиот закон за труд, работниците кои заработуваат минималната плата добиваат зголемување на секои три години.