Добивај вести на Viber
Попова Шапка ќе прерасне во скијачки центар по европски терк, објави денеска Владата. Усвоен е мастер-планот за инвестирање во туристичкиот центар Попова Шапка, изработен од реномирана меѓународна компанија, која вакви планови правела и за најпознати зимски центри во светот.
Премиерот Никола Груевски вели дека планот ќе се реализира со инвестирање во три фази. Во првата „Електрани на Македонија“ (ЕЛЕМ) ќе инвестира 30 милиони евра во нова шестоседна жичарница, во нови патеки и проширување на постојните, во поголеми паркиралишта и реконструкција на главниот пат. Ќе има и други активности со кои ќе се дуплира капацитетот на туристи и скијачи на Попова Шапка.
Втората и третата фаза треба да го дадат целосно новиот лик на овој скијачки центар. Се најавуваат големи инвестиции за изградба на хотели и ресторани и за нив Владата на меѓународен оглас ќе побара концесионер.
- Ова е сериозна инвестиција во Попова Шапка. Целта е таа да стане еден голем европски центар за привлекување туристи и скијачи. Се внимава и на тоа и во лето, кога нема снег, да има интересни содржини на Шапка. Мастер-планот дава сеопфатна содржина на активностите кои Владата заедно со потенцијални приватни партнери треба во иднина да ги прави, за Попова Шапка да прерасне во еден од најдобрите европски центри за скијање, изјави премиерот Груевски.
Инаку, во планот на Владата е и паралелно да инвестира во други зимски центри - за модернизација на скијачките центри во Крушево и во Пониква (подобрување на патеките и осветлување) се планираат околу 2,5 милиони евра. Во план се инвестиции и во центарот Пелистер, како и во други зимски центри.