Попушти браната на Слатинско Езеро

Добивај вести на Viber

Дирекцијата за заштита и спасување информираше дека во попладневните часови дојде до попуштање на браната на  Слатинското Езеро што придонело за зголемено истекување на вода од акумулацијата. Браната била претходно оштетена и нејзината состојба постојано се следи. На три лица кои живеат во околината на браната им е предложено привремено да се евакуираат од своите живеалишта за во случај оштетувањето да доведе до поголемо истекувањена вода.

Опасност од пробивање на водата и излевање нема, уверуваат надлежните од Центарот за управување со кризи и водостопанство „Охридско Езеро“ чии екипи се наоѓаат на терен. Се вршат проценки за штетата и за активностите што ќе се преземаат за спречување какви било несакани последици.

Според последните информации, нивото на водата во акумулацијата е под преливната шахта, односно под максималното ниво. Од безбедносни причини, односно заради интервенција на браната нивото на водата во езерото дополнително да се намали, тоа е единствено можно преку отворање на испустниот вентил што се наоѓа на дното на самото езеро. Заради тоа се очекува во текот на ноќта, најдоцна утре, на утро специјални екипи на Дирекцијата за управување со кризи да дојдат на местото и да го отворат испустниот вентил на акумулацијата.

Вработените од подрачното одделение на Дирекцијата за заштита и спасување се на терен и ја следат ситуацијата со истекувањето на Слатинската брана и се во состојба веднаш да интервенираат ако за тоа има потреба

Истекот на водата од Слатинското Езеро низводно оди преку Слатински чифлик и Издеглавско поле се до реката Сатеска, и на тој потег нема населени места што директно се изложени на опасност од поплавување, освен две куќи од кои само едната е населена. Од превентивни причини е побарана евакуација на тоа семејство.