Поради поинтензивни врнежи се врши максимален испуст на водата од Охридско езеро

Добивај вести на Viber

Во врска со најавениот засилен ветар и врнежи во охридската котлина, по одржаната седница на Регионалниот штаб за управување со кризи-Охрид  се донесени заклучоци за преземање на соодветни мерки за превенција.

Се врши максимален испуст на вода од Охридското Езеро во реката Црн Дрим, а извршено е и пренасочување на река Сатеска директно кон Црн Дрим, информираат од  Центарот за управување со кризи.

За состојбата известени се угостителските објекти кои се лоцирани близу крајбрежјето на Охрид и Струга. Исто така, наведуваат од ЦУК, ќе се врши засилена контрола на патниот правец Струга-Дебар во село Луково поради зголемениот истек на вода од испустот на браната Глобочица.

„Состојбата будно се следи од страна на сите субјекти на ЦУК, кои ќе преземаат соодветни мерки за санирање на евентуални настанати ризици и опасности“, соопштуваат од ЦУК.

Поради најавите за врнежи од УХРМ, во кои се вели дека се очекуваат врнежи на дожд во количина од 20 литри на метар квадратен, се стравува од значително зголемување на дотекот на водите.

„Ова ќе предизвика нагло зголемување на дотекот на вода во сливното подрачје на реката Црн Дрим, особено на профилот на браната Глобочица. Најголемите протеци на вода добиени според анализите правени согласно со метеоролошката прогноза се очекува да бидат утре, околу 06 часот изутрина, а ќе траат до попладневните часови, истиот ден кога се очекува стабилизрање на истеците на вода“, велат од ЦУК.