Поранешниот владин советник Андреевски формираше нова компанија: Ќе донесам поевтин гас во земјата
Објавено во: Економија 22 Февруари, 2023
Поранешниот советник за енергетика и гасификација Митко Андреевски, формираше своја нова компанија „Гама Гас Трејд“, со која, како што вели за „Фактор“, ќе се обиде да понуди пониски цени на природен гас на пазарот во Македонија.
Компанијата ќе работи на национално ниво, регистрирана е со седиште во Кисела Вода, а Андреевски вели дека нема да работи со претпријатија поврзани со државата.
„Со либарилазацијата на пазарот се отвора можност за трговија со природен гас. Компанијата ќе биде дел од портфолиото на групација со која раководам и сега.
Во минатата година бевме сведоци на различни цени на природен гас за ист период. Тоа е причината за формирањето на Гама Гас Трејд која наскоро ќе започне постапка за добивање на лиценца од Регулаторната комисија за енергетика. Верувам дека со 15 годишното искуство во оваа област, можам да придонесам и да понудам поконкурентни цени со подобри бизнис модели од постоечките кои се на пазарот кај нас, пред се’ на индустријата, вели поранешниот владин советник.
Со либерализацијата, тој вели дека ќе тргува со природен гас кој ќе се носи од терминалите во Грција и преку гасоводот во Бугарија.
- Природниот гас ќе биде од слободниот пазар на природен гас во регионот, преку портовите за гас во Грција, секако и преку гасоводните системи на Бугарскиот оператор, изјави некогашниот советник на поранешниот премиер Зоран Заев.
Енергетскиот консултант кој беше дел од иницијативата да се инвестира во терминал за течен гас во Грција и градење на интерконектор меѓу Грција и Македонија, тврди дека ќе работи само со индустриски капацитети.
- Компанијата ќе се фокусира кон индустриските потрошувачи и ќе им понуди различини модели на договори за гас, нудејќи сигурност и ценовна предвидливост. Тие се единствени клиенти на гасоводната мрежа во Македонија досега, ни одговори Андреевски.