ПОСКАПАТА ГРАДИНКА ВО КАРПОШ ГИ НАЛУТИ РОДИТЕЛИТЕ: „Се надевам Карпош ќе преземе некои од трошоците како давање пари за поправка на прозори“

Добивај вести на Viber

Месечната цена за згрижување на децата во градинките во скопската Општина Карпош се зголеми за 500 денари, и наместо 1.490 денари како досега, ќе чини 2.000 денари.

Зголемувањето на цената беше изгласано на неодамнешната седница на Советот на Општина Карпош.

„Меѓу советниците, конечно беше постигнат потребниот консензус околу предлогот за зголемување на цените за згрижување и престој на дечињата во предучилишните установи на територија на Карпош. Имено, досега месечната претплата изнесуваше 1.490 денари, а отсега за целодневен месечен престој за дете до 6 годишна возраст ќе се плаќа 2.000 денари, а истиот месечен надомест ќе изнесува и за престој и исхрана на дете од 6 до 10-годишна возраст“, објави Општината на својата фејсбук страна.

Од општината поскапувањето го правдааат со зголемените режиски трошоци и континуираниот пораст на цените на прехранбените производи.

„Неопходна беше ваквата корекција на месечната партиципација во градинките, која ќе резултира со подобрување на квалитетот на услугите кои ќе ги добиваат најмладите карпошани“, велат од Општината.

Сепак родителите се налутија на оваа одлука, посебно затоа што во сите градинки на нивен товар се и материјалите за работа, хигиенските препарати, а во некои градинки се оди дотаму што се бараат пари за преправка на прозорци, мабавка телевизори и клима уреди.

Токму затоа со коментар се огласи младата актерка и мајка Ирена Илиевска, која со статус на фејсбук објасни што се се барало од неа откако детето и оди во градинка.

„Искрено се надевам дека со ова поскапување на партиципацијата(од 1490 на 2000ден.), од општина Карпош ќе преземат и дел од редовните трошоци кои им се "доделуваат" на родителите, меѓу кои се, верувале или не:

-поправка на прозор или купување и монтирање нов прозор("за да не ви мрзнат децата")

-средства за хигиена(влажни марамици, тоалетна, сапуни итн) -телевизор(донација од родителите), -собирање средства за подлоги за седење ("за да не ви седат на под децата")

-задолжителна годишна уплата за материјали(боички, листови, блокчиња...)

Зависно од тоа кое "штравче ќе прочкрипи", тука сме ние родителите, сложно да донираме и да го поправиме 

Искрено се радувам што конечно општината ќе води сметка за сето тоа(или барем за еден дел), со цел, како што е наведено, цитирам: "...подобрување на квалитетот на услугите кои ќе ги добиваат најмладите карпошани!" 

А се до тогаш и се додека се работи за наши деца, ние родителите ќе поправаме прозори и ќе донираме се што е потребно. Нели?“ напиша таа на фејсбук.