Потврдено: Водата во Охридското езеро е безбедна за капење

Добивај вести на Viber

Во пресрет на летото, анализите на Центарот за јавно здравје-Охрид покажаа дека во крајбрежниот дел на Охридско Езеро водата е од прва класа и капењето во неа е безбедно. Мостри биле земени од во втората половина на мај, а се анализирани 29 примероци на површинска вода на мерните места од „Св. Наум“ до село Радожда и на три примероци од реките што се вливаат во Езерото, Велгошка, Коселска и Сатеска. „Генерално, во мај оваа година водата во крајбрежниот дел, односно делот кој се користи за капење и рекреација на Охридското Езеро, од македонска страна, најповеќе припаѓала на прва класа, односно 90 проценти од анализираните примероци, а од втора класа 10 отсто„, соопштија од Центарот. Според класификација на водите, водата од прва класа, во природна состојба со соодветен третман-дезинфекција, може да се користи за водоснабдување, а вода од втора класа за капење, спорт, рекреација и слично. Опасност од оптоварување на екосистемот и органско загадување на езерото од македонска страна постои во крејбрежниот дел од домаќинства кои не се зафатени со колекторскиот систем за пречистување на отпадните води. Се работи за неколку домаќинства на потегот од „Св. Софија“ до „Сараиште“, од село „Пештани“ до „Св. Наум“, кај вливот на река Велгошка и од Струга до село Радожда, се вели во соопштението на Центарот. Примероците на вода од реките што се вливаат во Охридското Езеро на 28 биле земени од реките Коселска и Сатеска и на 29 Велгошка река, според анализите и припаѓаат на втора класа.