Познато кој ќе го организира одбележувањето на 1.000 години од Охридската архиепископија
Објавено во: Македонија 20 Април, 2018
Владата на Република Македонија формира работна група за утврдување програма за одбележување на јубилејот 1.000 години од формирањето на Охридската архиепископија.
Членови на оваа работна група се претставници од Комисијата за односи со верските заедници и религиозни групи, Министерството за култура, Министерството за внатрешни работи, Министерството за труд и социјална политика, Службата за општи и заеднички работи, Музејот на Македонија, Заводот за заштита на спомениците на културата и музеј Охрид, општина Охрид, Македонска филхармонија и Православниот богословски факултет „Св. Климент Охридски“.
МПЦ-ОА информира дека овој милениумски неповторливи јубилеј има голема важност за Република Македонија и за цела Европа.
Светиот архиерејски синод на Македонската православна црква – Охридска архиепископија на својата редовна седница одржана на 13 март донесе одлука за чествување на значајниот јубилеј 1.000 години од формирањето на Охридската архиепископија. Централното одбележување ќе се одржи во катедралниот храм на охридските архиепископи „Св. Софија“ во Охрид на 27 мај.